Loading ...
Ekspertë të qeverisë amerikane, ish zyrtarë të Departamentit Amerikan të Mbrojtjes dhe ish zyrtar të NASA-s kanë vijuar me raportimet e tyre përpara Komitetit Mbikëqyrës së Dhomës së Përfaqësuesve në lidhje me Objektet e Paidentifikuara Fluturuese që shpesh janë konsideruar se janë UFO.
Lusi Elizondo, autor i një raporti për praninë e UFO-ve që ka shërbyer si zyrtar i Departamentit Amerikan të Mbrojtjes dhe ish drejtor i programit të Avancuar të Identifikimit të Kërcënimeve Ajrore tha se objektet e paidentifikuara ajrore janë reale dhe se qeveria është angazhuar për t’i fshehur.
“Më lejoni të jem i qartë, objektet e paidentifikuara ajrore janë reale. Teknologjitë e Avancuara që nuk janë bërë nga qeveria jonë apo ndonjë qeveri tjetër, po monitorojnë vendosjet ushtarake mbarë botën dhe informacione tejet të ndjeshme. Unë mendoj se ne jemi në mesin e një gare të fshehtë e cila ka nisur dekada më parë sa I përket armatimeve të fshehta. Kjo garë financohet nga taksat tona dhe përfaqësuesit tanë na fshehin detaje për gjëra të tilla.”, tha Elizondo.
Një gazetar investigativ që dëshmoi përpara Komitetit Mbikqyrës u shpreh se Pentagoni ka një program sekret që quhet Immaculate Constellation që dëshmon ekzistencën e objekteve të paidentifikuara ajrore, por të gjitha detajet mbahen të fshehta.
Në mars të këtij viti, Pentagoni amerikan hodhi poshtë të gjitha zërat për zbritjen e alienëve në Tokë duke thënë se nga rishikimi i të gjitha të dhënave të të gjithë viteve të fundit, tregohet se nuk ka asnjë provë për praninë e UFO-ve.
“Të gjitha përpjekjet hetimore, në të gjitha nivelet e klasifikimit, kanë arritur në përfundimin se shumica e pamjeve ishin objekte dhe fenomene të zakonshme dhe rezultat i identifikimit të gabuar,” u tha gazetarëve gjenerali Pat Ryder në muajin mars./abcnews.al
