Kancelari austriak Karl Neuhammer është kritikuar pasi në një video tha se prindërit me të ardhura të ulëta mund t’i ushqejnë fëmijët e tyre me hamburger nga McDonald’s. Në video, kancelari shihet duke folur për varfërinë përpara se të ankohej sesi media e portretizoi urinë e fëmijëve.
“Pra, çfarë do të thotë që një fëmijë nuk ha një vakt në Austri? A e dini cili është vakti më i lirë në Austri? Nuk është i shëndetshëm, por është i lirë: një hamburger në McDonald’s – 1,40 euro, dhe nëse shoqërohet me patate të skuqura 3,50 euro. Tani a mund të pretendojë dikush seriozisht se ne jetojmë në një vend ku prindërit nuk mund ta përballojnë atë vakt për fëmijën e tyre”, tha ai.
“Nëse kam shumë pak të ardhura, duhet të punoj më shumë”, vazhdoi Nehammer në videon, e cila u filmua gjatë një eventi të verës dhe djathit pranë Salzburgut, konfirmoi Partia Popullore konservatore, lideri i së cilës ai është.
Një zëdhënës i McDonald’s Austria tha për Politico se ndërsa çmimet ndryshojnë, është e mundur të hani një vakt aq të përballueshëm sa vuri në dukje kancelari. Një hamburger me 250 kalori është më i liri në menunë e restorantit të zinxhirit amerikan.
“Bazuar në sensin e përbashkët, kjo është padyshim këshilla më e keqe shëndetësore që mund t’i jepni dikujt, dhe sigurisht fëmijëve,” tha Dorota Sienkiewicz, menaxherja e politikave të EuroHealthNet. “Sepse fëmijët nuk mund të mbrohen vërtet nga efektet e zgjedhjeve jo të shëndetshme të ushqimit”, shtoi ajo.
“Në Austri, askush nuk duhet të vdesë nga uria apo të ngrijë në dimër” tha Michael Landau, president i Caritas Austria, i cili punon për të parandaluar varfërinë. “Por kushdo që thotë se askush në Austri nuk është i uritur apo ka ftohtë nuk e ka idenë se si jetojnë njerëzit,” tha ai, duke iu referuar deklaratës së Nehammer.
Kancelari publikoi sot një video në platformën X duke mbrojtur ndihmën e qeverisë së tij për familjet me të ardhura të ulëta. Megjithatë, ai nuk kërkoi falje për postimin e tij. “Unë jam i mendimit se arritjet duhet të shpërblehen dhe e mbështes faktin që prindërit kanë për detyrë të kujdesen për fëmijët e tyre”, tha ai.
Dy ditë më parë, kancelari austriak nisi një fushatë për marrëdhëniet me publikun me mesazhe optimiste që synon të rrisë besimin e publikut në qeverinë e koalicionit, një vit përpara zgjedhjeve të përgjithshme në vend, mes kritikave ndaj partisë së tij.
“Beso në Austri” titullohej fushata e prezantuar nga Neuhammer, kreu i Partisë Popullore Konservatore (ÖVP). Ai njeh vështirësitë me të cilat përballet shoqëria për shkak të pandemisë, luftës ruse në Ukrainë dhe inflacionit. “Në të njëjtën kohë, ne pamë se populli i Austrisë është shumë më i fortë nga sa na thanë shumë dhe nga sa ia pranuam vetes”, theksoi ai.
Megjithatë, ai nuk paraqiti asnjë plan të ri, por përmendi masat kundër inflacionit, subvencionet e energjisë së rinovueshme dhe frenimin e imigracionit të parregullt midis arritjeve të qeverisë, një koalicion konservatorësh dhe të gjelbër.
Fushata zhvillohet një vit para zgjedhjeve parlamentare. Sipas sondazheve të opinionit, ÖVP është në vendin e dytë me një vlerësim prej rreth 24%, pas Partisë së Lirisë Austriake të ekstremit të djathtë (FPÖ) me pothuajse 30%, bazuar në sondazhet e fundit.
