Ish-presidenti i Hondurasit, Juan Orlando Hernandez është arrestuar me akuza për drogë. Policia u vendos në shtëpinë e tij në kryeqytetin Tegucigalpa disa orë pasi SHBA kërkoi ekstradimin e tij për të parandaluar largimin e tij. Ata u zhvendosën kur u lëshua një urdhër arresti.
Ai është dorëzuar dhe është shoqëruar me pranga nga shtëpia. Hernandez qeverisi Hondurasin nga viti 2014 deri në janar të këtij viti. Ai i mohon akuzat ndaj tij.
Ai akuzohet se ka qenë i përfshirë në një rrjet të trafikut të drogës ku përfshihej vëllai i tij më i vogël, Tony Hernandez, i cili vitin e kaluar u dënua me burgim të përjetshëm në SHBA. Gjatë gjyqit të Tony Hernandez, prokurorët pretenduan se bosi famëkeq meksikan i drogës Joaquín “El Chapo” Guzman i kishte dorëzuar personalisht Tony Hernandez 1 milion dollarë raporton “BBC”. Sipas prokurorëve, “El Chapo” Guzman i tha të riut Hernandez që t’ia kalonte paratë vëllait të tij Juan Orlando si ryshfet.
Hondurasi ka qenë prej vitesh një vend kryesor tranziti për drogën e kontrabanduar nga Amerika e Jugut në Shtetet e Bashkuara dhe së fundmi është bërë gjithashtu një vend ku prodhohet kokaina. Juan Orlando Hernandez ka pohuar gjithmonë se ai bëri gjithçka në fuqinë e tij për të luftuar trafikun e drogës dhe gjatë administratës së Presidentit Donald Trump, ai gëzonte mbështetjen e qeverisë amerikane. Por marrëdhënia e tij me SHBA-në u përkeqësua nën Presidentin Joe Biden.
Javën e kaluar, Departamenti Amerikan i Shtetit zbuloi se zoti Hernandez ishte shtuar në listën e personave të ndaluar për të hyrë në SHBA për shkak të aktiviteteve të supozuara korruptive. Në një deklaratë, Sekretari Amerikan i Shtetit Antony Blinken tha se kishte raporte “të besueshme” se ish-udhëheqësi i Hondurasit ishte “angazhuar në korrupsion të konsiderueshëm duke kryer ose lehtësuar akte korrupsioni dhe narkotrafiku, dhe duke përdorur të ardhurat e aktivitetit të paligjshëm për të lehtësuar fushata politike”.
Zoti Hernandez i’u përgjigj vërejtjeve të zotit Blinken duke thënë se akuzat kundër tij bazoheshin në deklaratat e dhëna nga trafikantët e dënuar të drogës, për të cilët ai thotë se ishin hakmarrë. Avokati i tij kishte argumentuar se ai kishte imunitet nga arrestimi për shkak të anëtarësimit të tij në parlamentin e Amerikës Qendrore. Por ekspertët ligjorë thonë se imuniteti i dhënë nga organi rajonal mund të hiqet nëse e kërkon shteti i origjinës së anëtarit. / abcnews.al
