Ka nisur me tensione vizita e ministrit të Jashtëm turk Mevlüt Çavuşolulu në Greqi. Ndalesa e parë sot e shefit të diplomacisë turke ishte në Komotini, pjesë e Trakisë ku qëndroi rreth 5 orë. Çavuşolulu vizitoi konsullatën turke në Komotini, shkollën e mesme të minoritetit turk dhe drekoi me përfaqësuesit e pakicës myslimane, pasi mbodhi edhe një pemë.
Por s’u mjaftua me kaq. Ministri bëri një postim në Twitter duke shkruar se “Puna e myftinisë kontribuon në mënyrë të konsiderueshme në ruajtjen dhe forcimin e unitetit dhe solidaritetit të pakicës turke” në këtë pjesë të Greqisë.
Kjo nuk i pëlqeu Athinës zyrtare që reagoi përmes ministrisë së Jashtme duke theksuar që “Greqia mbetet e përkushtuar ndaj ligjit ndërkombëtar dhe të drejtave të njeriut dhe se zbaton plotësisht detyrimet që rrjedhin nga Traktati i Lozanës, i cili në mënyrë të qartë i referohet pakicës myslimane në Traki. Pakica myslimane në Traki ka rreth 120,000 banorë grekë.
Përpjekjet e vazhdueshme të Turqisë për të shtrembëruar këtë realitet, si dhe pretendimet e mos-mbrojtjes së të drejtave të tyre, ose të diskriminimit të pretenduar, janë të pabazuara” thuhet në deklaratë.
Nesër, Ministri i Jashtëm turk do të ketë takime me Kryeministrin Kyriakos Mitsotakis dhe Ministrin e Jashtëm Nikos Dendias në kushtet kur dy vendet kanë një marrëdhënie shumë të tensionuar për shkak të cështjes së kufirit detar./ db/Abcnews.al
