Barcelona është cilësuar si “mbretëresha” e kësaj merkatoje, pasi ka bërë përforcime të nivelit të lartë edhe pse financat e klubit prej kohësh janë në një situatë delikate.
Tashmë trajneri Xavi Hernandez do t’i dalë për detyrë të përzgjedhë më të mirët për të luajtur në fushë, pasi alternativat janë të shumta.
Në një intervistë për mediat spanjolle, tekniku katalan tha se të gjithë nisen nga zero dhe e kaluara nuk vlen aspak, teksa paralajmëroi se mund të luajë edhe me skemën 3-4-3, për të pasur më shumë variacion.
“Kontributi i Pique dihet, por të gjithë nisemi nga zero dhe në fushë do të luajë kush ta meritojë. Kemi bërë shumë përforcime, por presim ende të tjera, pasi duam të kemi nga dy lojtarë për çdo rol. Krahas skemës tonë karakteristike, po mendoj edhe aplikimin e rreshtimit 3-4-3, që e kemi provuar disa herë sezonin e kaluar dhe mendoj se mund të jetë një variacion interesant”, u shpreh Xavi.
Rikthimi i Messit te Barcelona ka qenë kryefjala e lajmeve sportive të kësaj jave, teksa Xavi pranoi se kjo është një ide konkrete e drejtuesve të klubit, por që nuk mund të vihet në zbatim kurrsesi këtë verë.
“Rikthimi i Messit është një ide dhe ndoshta më shumë, një plan i drejtuesve për verën e ardhshme. Do të ishte mirë të mos ishte larguar fare, megjithatë do të ishim shumë të kënaqur që të rikthehej sërish”, deklaroi Xavi. /f.a/abcnews.al
