Bojkoti i futbollit shqiptar mori fund dhe ekipet janë gati të nisin sezonin e ri. Nesër luhet java e parë e Kategorisë së Parë, të dielën zhvillohen duelet e raundit të parë të Kupës së Shqipërisë, ndërsa të mërkurën nis Kategoria Superiore.
Sindikata e Futbollistëve Profesionistë Shqiptarë ka reaguar në lidhje me këtë çështje me anë të një postimi në “Instagram”, ku ndër të tjera shkruan:
“Sindikata e Futbollistëve Profesionistë Shqiptarë përshëndet rinisjen e aktivitetit futbollistik në të gjithë vendin dhe për të gjitha kategoritë, megjithëse në grevë ishte vetëm Liga dhe jo FSHF.
Ndërsa në lidhje me bojkotin, përveç takimit të Kryeministrit me Presidentin e FSHF, si ne dhe opinioni sportdashës akoma nuk kemi dijeni se çfarë rezultati arriti bojkoti.
Kjo situatë bëhet akoma më e çuditshme kur dëgjon Ligën, jo vetëm se qëndrimin e saj e shpreh Presidenti FSHF dhe jo ai i Ligës, por edhe për faktin se me shpalljen e fundit të bojkotit u deklarua se për kërkesat e paraqitura ka dakordësi dhe janë futur në rrugën e zgjidhjes.
Ndërsa krejt ndryshe shprehet Kryeministri i vendit i cili e quan bojkotin absurd dhe shprehet se tani që mbaroi bojkoti mund të diskutohet për zgjidhjen e kërkesave të ligës.
Pyetja që bëjmë ne sot është: Kush gënjen në këtë pikë Kryeministri apo Liga?
A janë futur në rrugën e zgjidhjes 4 kërkesat siç thotë Liga apo tani do të flitet për zgjidhjen e tyre?
Nëse janë futur në rrugën e zgjidhjes cilat janë këto kërkesa dhe në çfarë pikë janë këto diskutime.
Nëse ky bojkot ka shërbyer vetëm për të rivendosur në pozicionet e protagonistit personazhe të caktuar të botës së sportit apo politikës kjo është tallje me të gjithë ata që besuan se, ky bojkot ishte në të mirë të sportit.
Urojmë me shpirt që bojkoti ti ketë shërbyer sportit në përgjithësi e futbollit në veçanti“, lexohet në komunikatën e Sindikatës së Futbollistëve Profesionistë Shqiptarë. /abcnews.al
