Plot 10 vite që nga transferimi i Luka Modric te Real Madrid. Mesfushori kroat është një nga lojtarët kryesorë te madrilenët, teksa në mesin e fushës ka mbajtur gjithmonë ekuilibrat.
Në një postim në rrjetet sociale, Modric ka kujtuar ditën që ka firmosur kontratë me një nga klubet më të mira, nuk ka nguruar ta quajë kështu transferimin në “Santiago Bernabeu”.
“Në këtë ditë, 10 vjet më parë, nënshkrova një kontratë me Real Madridin, një nga vendimet më të mira të jetës sime”, u shpreh Modric përmes një postimi në “Twitter”.
“Të luash për klubin më të mirë në botë është një ëndërr dhe ende nuk dua të zgjohem. Hala Madrid! Le të vazhdojmë”, shkroi ai.
36-vjeçari vlerësohet si një nga mesfushorët më të mirë në botën e futbollit, teksa ai me Real Madridin ka fituar trofe të shumtë.
Luka Modric te klubi nga kryeqyteti spanjoll u transferua nga Tottenham për 35 milionë euro. /f.a/abcnews.al
