Andrea Pirlo, trajneri i Juventusit, pas ndeshjes me Dynamo Kiev ka folur për faqen zyrtare të UEFA-s dhe vlerëson paraqitjen e skuadrës së tij kundër ukrainasve. “Zhvilluam një ndeshje të mirë, pavarësisht se tashmë ishim të kualifikuar në raundin tjetër. Kishim nevojë të bënim një paraqitje të mirë për rritjen e ekipit dhe jemi të kënaqur”, deklaron fillimisht Pirlo.
Më pas ai flet për emra të veçantë, duke nisur me Chiesa, e për të kaluar te Morata-Ronaldo dhe sfida me Barcelonën. “I duhet kohë dhe mezi priste të lirohej. Me të vërtetë e donim Chiesa në skuadër dhe jemi të kënaqur me atë që ai ka bërë, edhe nëse është vetëm pikënisja. AI duhet të vazhdojë të rritet dhe të paraqitet mirë”.
“Ronaldo-Morata? Ata janë një garanci. Të vjen keq që Alvaro është i pezulluar për ndeshjen e kampionatit, por ai mund të përgatitet mirë për sfidën kundër Barcelonës. Ajo është gjithmonë një ndeshje speciale.
Ishte diçka e mrekullueshme të luaje si lojtar në të dhe vazhdon të jetë edhe tani si trajner. Gjithsesi për momentin më e rëndësishme është përballja derbi me Torinon të dielën. Fillimisht duhet të përqendrohemi tek ajo ndeshje”, përfundon Pirlo. /abcnews.al
