Milani nuk humbiste një ndeshje zyrtare prej muajit mars dhe disfata erdhi mbrëmjen e kaluar përballë Lille në Europa League. Kuqezinjtë u mposhtën 0-3 në “San Siro”, takim rreth të cilit foli Stefano Pioli, trajneri i ekipit italian.
“U përballëm me një skuadër të fortë dhe nuk është se e nisëm keq takimin. Më pas ia vështirësuam gjërat vetes. Prisja që të ishim më të rrezikshëm, por ata janë shumë të shpejtë dhe të fortë fizikisht. Shënuan të parët dhe më pas përfituan nga hapësirat që lamë pas.
Duhet të nxjerrim mësime nga kjo ndeshje. Jemi një ekip i ri, por i pjekur dhe do të gjejmë një mënyrë për të reaguar. Është hera e parë që do na duhet të analizojmë më shumë gjërat negative sesa ato pozitive. I lejuam shumë hapësira një skuadre shumë të mirë.
Ndihem mirë te Milani, ambienti është i shkëlqyer dhe drejtuesit na qëndrojnë shumë afër. Këtu janë kushtet ideale për të bërë sa më mirë punën tonë“, përfundon trajneri i ekipit kryesues të kampionatit italian. /abcnews.al
