Një ekip mjekë në repartin e Kardiokirurgjisë në QSUT kanë realizuar një operacion të vështirë në zemër, i pari në Shqippëri. Bëhet fjalë për ndërhyrjen që konsiston në zëvendësimin e valvolës së aortës me hapje të kufizuar.
Lajmin e ka dhënë ministrja e Shëndetësisë, Ogerta Manastirliu, në një postim në Facebook. Ministrja thotë se pas operacionit të suksesshëm, pacienti 67-vjeçar la me shëndet të plotë spitalin ditën e katërt.
‘Pas shumë vitesh eksperiencë me kirurgjinë mini-invazive të defekteve të lindura në zemër, prof. Altin Veshti, dr. Saimir Kuçi, dr. Alfred Ibrahimi dhe ekipi i Kardiokirurgjisë i drejtuar nga prof. Arben Baboçi, realizuan për herë të parë zëvendësimin e valvolës së aortës me hapje të kufizuar, mini-invazive, tek pacienti 67-vjeçar që vuante nga një problem serioz në zemër. Pacienti la spitalin në ditë e katërt pas ndërhyrjes dhe është në gjendje shumë të mirë shëndetësore. Një duartrokitje ekipit të kardiokirurgjisë që realizojnë sot në QSUT kirurgjinë më të avancuar të valvolës së aortës, siç kryhet në qendrat e mëdha të kardiokirurgjisë në Evropë”, shkruan Manastirliu.
