Përfundon pa sukses takimi i naftëtarëve me përfaqësues të firmës e cila pretendon se ka në administrin Uzinën e përpunimit të thellë të naftës në Ballsh.
Sipas naftëtarëve, gjatë takimit ka pasur premtime boshe, dhe nuk është ofruar asnjë zgjidhje për pagat e prapambetura dhe rifillimin e punës.
Kreu i sindikatës së naftëtarëve Sokol Dautaj, i pranishëm në takim bashkë me 5 specialistë të tjerë, ka konfirmuar se greva e urisë do të vazhdoj dhe paralel me të edhe protestat përpara uzinës dhe në qytetin e Ballshit.
Pjesë e takimit kanë qenë të njëjtët persona të cilët u afruan në mjediset e uzinës rreth dy muaj më parë dhe që premtuan nënshkrimin e kontratave me punonjësit, proces që nuk u finalizua asnjëherë.
Sipas naftëtarëve këto takime janë tentativa për të prishur grevën e urisë dhe për të ndaluar protestat e tyre, por pa marrë një zgjidhje konkrete janë të vendosur të vazhdojnë.
Kujtojmë se naftëtarët sot u futën me forcë në mjediset e uzinës dhe u ndalën edhe përpara godinës së boshatisur të administratës, për të treguar se kjo uzinë nuk ka pronar, ndaj kërkojnë ndërhyrje nga shteti për zgjidhjen e situatës. /abcnews.al/
