Pas infektimit të 10 të burgosurve në burgun e sigurisë së lartë në Drenovë të Korçës janë shtuar masat për ndalimin e përhapjes së infeksionit.
Në ambientet në hyrje të burgut janë vendosur tunele dezinfektimi ndërsa matet temperatura e të gjithë personave që vizitojnë këto ambiente.
Ata kanë të detyrueshme mbajtjen e maskave dhe dorezave.
Një prej familjarëve pranë burgut u shpreh për ABC News se gjatë kësaj kohe kanë folur me të afërmit e tyre përmes skype-it ndërkohë që i janë nënshtruar kontrollit të rreptësisht gjatë dërgimit të ushqimeve për të afërmit e tyre.
“Kam folur vetëm në skype, nuk e kam parë. Ndërsa këtu na kanë kontrolluar rreptësisht, na është matur temperatura dhe kemi hyrë me doreza dhe maskë”, thotë një prej tyre.
Ata thonë se kanë besim tek autoritetet shëndetësore dhe të burgut pasi kanë bërë të mundur marrjen e masave të menjëhershme ndërsa shprehen se nuk kanë frikë për të afërmin.
“Frikë kemi por derisa janë marrë masat jam i bindur për sigurinë. Tani vetëm çojmë ushqimet dhe pastaj flasim në skype me të afërmit. Masat janë marrë, janë dezinfektuar, masin temperaturën, mbajnë maska dhe doreza”, tha një tjetër.
Burgu i Sigurisë së Lartë në Drenovë të Korçës është kthyer në vatër të rrezikshme infeksioni për koronavirusin.
Mësohet se infektimi i të burgosurve është bërë nga personat që janë arrestuar dhe janë burgosur ditët e fundit.
Sakaq, ditën e djeshme janë kryer teste tek të gjithë të burgosurit brenda sektorit ku u shfaqen rastet e para.
N.D./abcnews.al
