Udhëheqësit e grushtit të shtetit të Gabonit njoftuan të enjten Raymond Ndong Sima si kryeministër të përkohshëm, pas marrjes së pushtetit ushtarak më 30 gusht, raportojnë mediat e huaja. 68 vjeçari, i cili ka shërbyer dhe më parë si kryeministër, është kundërshtari i presidentit të rrëzuar Ali Bongo Ondimba.
Gjithashtu të enjten, një ndërmjetës nga një bllok ekonomik rajonal tha se junta ushtarake është gati të hartojë një “udhërrëfyes” për një kthim në sundimin diplomatik. Komuniteti Ekonomik i Shteteve të Afrikës Qendrore (ECCAS) pezulloi Gabonin në fillim të kësaj jave, si rezultat i grushtit të shtetit.
Por më pas dërgoi një të dërguar, Presidentin e Republikës së Afrikës Qendrore, Faustin Archange Touadera, në Libreville për bisedime me udhëheqësin e grushtit të shtetit, gjeneralin Brice Oligui Nguema.
Agjencia franceze e lajmeve AFP citoi një zyrtar të regjimit të thoshte të enjten se Touadera dhe Nguema ranë dakord për hartimin e planit, duke mos dhënë detaje.
Nën udhëheqjen e Nguema, ushtria mori pushtetin, duke anuluar zgjedhjet e fundit presidenciale minuta pasi Bongo u shpall fitues. Bongo drejtoi vendin që nga viti 2009, ndërsa babai i tij Omar Bongo sundoi për 42 vjet para tij./abcnews.al
