YouTube vendosi të rikthejë kanalin e ish-presidentit Donald Trump sërish në platforme, pasi e pezulloi atë para 2 vitesh pas sulmit të 6 janarit në Kapitolin e SHBA.
Ky vendim erdhi pasi Twitter dhe Facebook, vendosen në muajt e fundit të rikthejnë llogaritë e tij, megjithëse Trump nuk ka rifilluar ende postimet në ato platforma. Kjo vjen gjithashtu pasi Trump njoftoi vjeshtën e kaluar se do të kandidonte sërish për president në vitin 2024.
“Ne vlerësuam me kujdes rrezikun e vazhdueshëm të dhunës në botën reale, duke balancuar mundësinë që votuesit të dëgjojnë në mënyrë të barabartë nga kandidatët kryesorë kombëtarë në prag të zgjedhjeve,” tha YouTube në një postim në Twitter të premten.
Përfaqësuesit e Trump nuk iu përgjigjen kërkesëa për koment nga CNN. Restaurimi i kanalit u raportua për herë të parë nga Axios.
YouTube fillimisht e pezulloi kanalin e Trump pas trazirave të Kapitolit, duke thënë se një video në kanal kishte shkelur politikën e tij kundër nxitjes së dhunës. Që atëherë, llogaria e Trump ishte bllokuar nga ngarkimi i videove të reja ose transmetimeve të drejtpërdrejta.
YouTube gjithashtu kishte çaktivizuar komentet nën videot në kanalin e Trump, të cilat duket se janë rikthyer të premten. Menjëherë pasi llogaria e tij u rivendos, një numër përdoruesish filluan të postojnë komente “mirë se erdhët përsëri” nën videot e vjetra.
Ndërsa YouTube nuk ishte asnjëherë platforma kryesore sociale e Trump, riaktivizimi i kanalit të tij do të rivendosë aksesin e tij në platformën masive të transmetimit të videove, ku llogaria e tij ka më shumë se 2.6 milionë abonentë.
Ndërsa më shumë platforma rivendosin llogarinë e Trump, disa po theksojnë gjithashtu se ai vazhdon të përballet me kufizime në atë që mund të postojë, me potencialin për t’u pezulluar përsëri.
YouTube tha në deklaratën e tij se “kanali i Trump do të vazhdojë t’i nënshtrohet politikave tona, ashtu si çdo kanal tjetër në YouTube”. YouTube zbaton një politikë sipas së cilës përdoruesit mund të marrin pezullime të përshkallëzuara bazuar në numrin dhe ashpërsinë e shkeljeve të tyre.
Ndërkohë, Meta tha muajin e kaluar se kishte vendosur rregulla të reja në llogarinë e Trump që mund të rezultojë në pezullimin e saj sërish nëse ai shkel rregullat e kompanisë.
Për momentin, ish-presidenti ka vazhduar të postojë vetëm në platformën e tij, Truth Social, ku ai filloi të postoj pasi u pezullua nga opsionet më të zakonshme. Trump të premten në mëngjes postoi një seri prej gjashtë videosh në Truth Social, të shumtat përsërisnin pretendime të rreme se zgjedhjet presidenciale të vitit 2020 ishin vjedhur. /abcnews.al
