Parlamenti i Portugalisë miratoi sot edhe një herë një ligj në favor të dekriminalizimit të eutanazisë, i cili u rihartua pasi u tërhoq nga Gjykata Kushtetuese tani do të vlerësohet nga presidenti konservator Marcelo Rebelo de Souza.
Projektligji, i cili deri tani binte në rezerva të presidentit dhe Gjykatës Kushtetuese, u miratua nga parlamenti për të katërtën herë në tre vjet, falë votave të mazhorancës socialiste.
Projektligji do t’i paraqitet kreut të shtetit, një katolik i vendosur dhe ish-profesor i drejtësisë. Souza do të jetë në gjendje ose ta publikojë atë ose ta kthejë për shqyrtim nga Gjykata Kushtetuese në mënyrë që ajo të verifikojë përputhjen e saj me Kushtetutën e vendit, ose të ushtrojë veton e tij, siç ka bërë tashmë në të kaluarën.
Versioni i ri i ligjit paraqet një risi për t’iu përgjigjur pyetjeve të ngritura nga Gjykata Kushtetuese. Eutanazia lejohet vetëm në rastet kur “vetëvrasja me ndihmën mjekësore është e pamundur për shkak të paaftësisë fizike të pacientit”, thuhet në projektligjin e miratuar sot.
Gjykata Kushtetuese, në të cilën kreu i shtetit apeloi, hodhi poshtë për herë të dytë një projektligj të mëparshëm në janar, duke vënë në dukje “pasaktësinë e papranueshme” në hartimin e tij dhe duke e kthyer atë në Parlament.
Gjykatësit kishin vendosur në mënyrë specifike se projektligji nuk përcaktonte qartë sëmundjet me intensitet të madh që mund të hapnin rrugën për një vdekje të asistuar mjekësor.
Shoqata e mjekëve katolikë, nga ana e saj, shprehu “kundërshtimin e saj të fortë” ndaj këtij ligji, duke konsideruar se “eutanazia e asistuar nga mjekësia dhe vetëvrasja nuk janë akte mjekësore”, thuhet në një njoftim për shtyp.
Pas Belgjikës dhe Holandës, rreth pesë vende evropiane, si Spanja fqinje, e kanë legalizuar eutanazinë deri më sot. /abcnews.al
