Papa Françesku ka thënë në një samit ndërfetar se feja nuk duhet të përdoret kurrë për të justifikuar dhunën dhe u bëri thirrje udhëheqësve të besimit që të kundërshtojnë tekat prej fëmijësh të liderëve që bëjnë luftë.
Duke folur në një konferencë mbi dialogun Lindje-Perëndim të mbajtur në Bahrein, kreu i Kishës Katolike tha se bota ishte në prag të një gremine delikate dhe paralajmëroi për një garë të re për t’u riarmatosur që ai tha se po ridizajnonte sferat e ndikimit të epokës së Luftës së Ftohtë.
Me sa duket duke iu referuar Ukrainës, Françesku dënoi një situatë ku disa pushtetarë janë kapur në një luftë të vendosur për interesa partizane, duke ringjallur retorikën e vjetëruar, duke ridizajnuar sferat e ndikimit dhe blloqet kundërshtare.
“Duket se jemi dëshmitarë të një skenari dramatik dhe fëmijëror: në kopshtin e njerëzimit, në vend që të kultivojmë mjedisin tonë, ne po luajmë me zjarrin, raketat dhe bombat, armët që sjellin pikëllim dhe vdekje, duke mbuluar shtëpinë tonë të përbashkët me hi dhe urrejtje”, tha ai.
Kisha Ortodokse Ruse, e cila dërgoi një përfaqësues në konferencë, e ka mbështetur fuqishëm Kremlinin në luftën e tij dhe e ka justifikuar atë në baza fetare. /abcnews.al
