Pandev vendos të dalë në pension, var këpucët në gozhdë në fund të sezonit

Ish-lojtari i Maqedonisë së Veriut, Goran Pandev, ka vendosur të var këpucën në gozhdë në fund të këtij sezoni.

Lajmin e ka bërë të ditur vetë futbollisti i Genoas i cili para mediave tregoi se ky është sezoni i tij i fundit si futbollist.

Në intervistën për “Corriere dello Sport”, lojtari maqedonas tregoi gjithashtu se të ardhmen e tij nuk e shikon si trajner dhe se ka më shumë dëshirë të jetë drejtor dhe të spikasë talentet e reja.

“Vazhdova të luaja edhe për një tjetër sezon dhe e bëra këtë për tifozët. Fansat e Genoas gjithmonë më kanë mbështetur dhe meritojnë mirënjohjen time. Duhet të falënderoj edhe presidentin Preziosi që më bindi të qëndroja, por ky është sezoni im i fundit në futbollin e luajtur. E ardhmja? Nuk e kam menduar ende, por me siguri që nuk do të bëhem trajner, e shoh veten më shumë në rolin e drejtuesit për të vlerësuar të rinjtë”, deklaroi Pandev.

Lojtari i Genoas ka luajtur 635 ndeshje ne karrierën e tij dhe ka shënuar në total 144 gola, ndërsa me Maqedoninë e Veriut ka zhvilluar 122 ndeshje duke shënuar 38 gola. /f.a/abcnews.al