Shkarkimi i tekniku Hansi Flick, menjëherë pas humbjes në miqësore ndaj Japonisë ka lënë një “boshllëk” goxha të madh në pankinën e Kombëtares së “pancerave” gjermanë, të cilët prej kohe të gjatë tashmë, nuk e kanë atë lavdinë e dikurshme.
Ndër emrat e përfolur për të marrë drejtimin e stolit të Kombëtares, përveç ish-teknikut të Bayern Munich, Julian Nagelsmann, tashmë në listë është dhe tekniku i “të kuqve” të Liverpool, Jurgen Klopp.
Mirëpo, pavarësisht interesit të Kombëtares, Klopp duket se do të qëndrojë besnik i “gjigandëve” anglezë, teksa sipas raportimeve më të fundit të prestigjiozes britanike, “Daily Mail”, tekniku gjerman do të refuzojë ofertën e “pancerave” në rast se vjen gjatë kohës kur ai është duke drejtuar Liverpool.
Ndërkaq, kujtojmë se te Liverpool, Klopp ndodhet që prej vitit 2015 dhe kontrata aktuale e gjermanit me “të kuqtë” e Premier League skadon në verën e vitit 2026. /i.m /abcnews.al
