Organizata për Siguri dhe Bashkëpunim në Evropë (OSBE) ka thënë se do të “evakuojë përkohësisht” të gjithë anëtarët e saj të misionit ndërkombëtar nga Ukraina sa më shpejt të jetë e mundur. Përditësimet erdhën të enjten në një deklaratë të botuar nga Sekretarja e Përgjithshme e OSBE-së Helga Maria Schmid. Schmid tha se vendimi për të tërhequr stafin e OSBE-së nga Ukraina ishte “për shkak të luftimeve të vazhdueshme dhe situatës së përkeqësuar të sigurisë” në vend raporton gazetari Martin Goillandeau i “CNN”.
Një zëdhënës i Sekretariatit konfirmoi për “CNN” se anëtarët e Misionit Special të Monitorimit (SMM) do të ishin në mesin e të evakuuarve.
“Përkushtimi dhe guximi i stafit të OSBE-së është i lavdërueshëm,” thuhej në deklaratën e Schmid. “OSBE-ja krijoi menjëherë Misionin Special të Monitorimit (SMM) në 2014 dhe burrat dhe gratë e përkushtuara të këtij misioni kanë qenë sytë dhe veshët tanë të paanshëm në terren në të gjithë vendin”.
Sekretarja e Përgjithshme tha se vendimi për evakuim “nuk u mor lehtë dhe zhvendosja duhet të jetë e përkohshme,” duke vënë në dukje se, “ne kemi një trashëgimi për të cilën duhet të krenohemi në vend. Mezi presim të rifillojmë misionet tona kur ta lejojnë rrethanat”.
Deklarata e Schmid mbyllet duke thënë se “siguria e grave dhe burrave të përkushtuar që shërbejnë si sy dhe veshë të paanshëm të komunitetit ndërkombëtar në terren në të gjithë vendin është e domosdoshme”. / abcnews.al
