Nga Artan Diko
Prej disa ditësh në shkollën 9-vjeçare të qytetit të Beratit, “22 Tetori” është emëruar mësues për lëndët e Fizikës dhe Informatikës 62-vjeçari Ëngjëll Bregu, i dënuar në vitin për “pedofifi” dhe “ngacmim seksual” të fëmijëve në vitin 2003. Prindërit e fëmijëve kanë shprehur këtë shqetësim për mediat, duke kërkuar largimin e mësuesit nga shkolla.
Mësuesi ka dorëzuar dëshminë e penalitetit ku thuhet se ai është i padënuar, megjithatë prindërit kanë dyshime për shkak të së shkuarës së tij. Sipas burimeve me ABC drejtoria e shkollës ka dalë me shpjegimin se ai është emëruar nga DAR. Vetë nxënësit e shkollës tregojnë se kanë frikë prej tij gjatë zhvillimit të orëve të mësimit. Një prej vajzave thotë se mësuesi i shikon në një formë që asaj i ngjall frikë.
Nxënësit deklarojnë se, ai u jep lëndët mësimore të fizikës dhe informatikës dhe se ka mbërritur në shkollë prej disa ditësh. “Mësuesi na jep fizikë dhe informatikë. Kemi dëgjuar që ka ngacmuar nxënës dhe që është dënuar dhe kemi pak frikë. Ai sesi të shikon në klasë dhe për këtë kemi njoftuar edhe prindërit”-shprehen nxënësit e shkollën 9-vjeçare “22 Tetori.
Në vitin 2003, kanë qenë disa nxënëse të shkollës 9-vjeçare “Uznovë” në Berat, që e kanë denoncuar mësuesin e tyre kujdestar Ëngjëll Bregu se gjatë një ekskursioni në Bogovë ai i kishte prekur në pjesët intime të trupit.
Mësuesi u arrestua dhe u dënua për “pedofili” dhe “ngacmim seksual” nga Gjykata e Beratit me burg, por gjykata nuk ja hoqi asokohe të drejtën e rikthimit në detyrë edhe pse u kërkua nga prokuroria. Pas kryerjes së 6 muajve burg, ai u rikthye në detyrë në vitin 2004 në një shkollë 9-vjeçare në fshatin “Hinkë” më Dimal dhe një muaj më pas u transferua në shkollën 9-vjeçare të fshatit “Çiflik”, po në bashkinë Dimal, për të qenë më afër shtëpisë.
Në 25 Prill 2009 ai është akuzuar sërish nga 13 prindër se ka ngacmuar seksualisht fëmijët e tyre në këtë shkollë. Prindërit dërguan asokohe një peticion në Drejtorinë Arsimore Berat, ku kanë shpjeguar sjelljet jo të hijshme të mësuesit. Prindërit e akuzonin mësuesin Ëngjëll Bregu se vinte i dehur në shkollë, se organizonte ekskursione pa miratimin e drejtorisë së shkollës dhe se i prekte vajzat e mitura në pjesë të ndryshme të trupit.
Pas këtij peticioni, DAR Berat e pezulloi atë nga detyra por për shkak se denoncimi nuk u bë në polici, Bregu nuk u arrestua sërish. Pas 13 vjetësh i larguar nga sistemi arsimor, me një vendim që nuk dihet se nga kush është firmosur, mësuesi Ëngjëll Bregu, u rikthye në arsim dhe prej 1-javë është emëruar në shkollën 9-vjeçare “22 Tetori”, në qendër të qytetit të Beratit./Abcnews.al
