Bota po përballet me sfida “të frikshme”, përfshirë Covid-in, luftën në Ukrainë dhe linë e majmunëve, ka paralajmëruar kreu i Organizatës Botërore të Shëndetësisë.
Tedros Adhanom po fliste në Gjenevë, ku ekspertët e agjencisë shëndetësore të OKB-së po diskutonin për shpërthimin e lisë së majmunëve në 15 vende jashtë Afrikës.
Më shumë se 80 raste janë konfirmuar në Evropë, SHBA, Kanada, Australi dhe Izrael.
Megjithatë, rreziku për publikun e gjerë thuhet të jetë i ulët.
Lija e majmunit, virusi që është më i zakonshëm në pjesët e largëta të Afrikës Qendrore dhe Perëndimore, nuk ka tendencë të përhapet lehtësisht midis njerëzve dhe sëmundja zakonisht është e lehtë.
Shumica e njerëzve që kapin virusin shërohen brenda pak javësh, sipas Shërbimit Shëndetësor Kombëtar të Mbretërisë së Bashkuar .
Përhapja i ka habitur shkencëtarët dhe zyrtarët shëndetësorë në Mbretërinë e Bashkuar të cilët kanë dhënë këshilla të reja, duke thënë se kontaktet me rrezik të lartë të rasteve duhet të izolohen për tre javë.
Belgjika u bë vendi i parë që shpalli një karantinë tre-javore për personat e infektuar të premten.
Më shumë raste të konfirmuara pritet të shpallen në Mbretërinë e Bashkuar të hënën, raporton gazeta Guardian.
Duke folur në hapjen e Asamblesë Botërore të Shëndetit Dr Tedros tha: “Sigurisht që pandemia Covid nuk është e vetmja krizë në botën tonë.”
“Ndërsa flasim, kolegët tanë në mbarë botën po i përgjigjen shpërthimeve të Ebolës në Republikën Demokratike të Kongos, lisë së majmunëve dhe hepatitit të një shkaku të panjohur dhe krizave komplekse humanitare në Afganistan, Etiopi, Somali, Sudanin e Jugut, Republikën Arabe Siriane, Ukrainë dhe Jemen.”
Lexo edhe: Zgjerohet harta, 3 shtete të tjera konfirmojnë linë e majmunit
“Ne përballemi me një konvergjencë të frikshme të sëmundjeve, thatësirës, urisë dhe luftës, të nxitura nga ndryshimet klimatike, pabarazia dhe rivaliteti gjeopolitik”, shtoi kreu i OBSH-së.
OBSH tha më herët se një numër i rasteve të tjera të dyshuara të lisë së majmunëve po hetoheshin – pa përmendur vendet e përfshira – dhe paralajmëroi se më shumë infeksione kishte të ngjarë të konfirmoheshin.
Pasi shpërthimi u identifikua për herë të parë në Mbretërinë e Bashkuar, virusi filloi të zbulohej në të gjithë Evropën.
Raste të reja u konfirmuan në Austri dhe Zvicër të dielën.
Nuk është ende e qartë pse po ndodh tani ky shpërthim i papritur.
Një mundësi është që virusi të ketë ndryshuar në një farë mënyre, megjithëse aktualisht ka pak prova që sugjerojnë se ky është një variant i ri.
Një shpjegim tjetër është se virusi e ka gjetur veten në vendin e duhur në kohën e duhur për të lulëzuar.
Gjithashtu, lija e majmunëve mund të përhapet më lehtë sesa në të kaluarën, kur vaksina kundër lisë ishte përdorur gjerësisht./abcnews.al/
