Trajneri i Barcelonës, Ronald Koeman, ka folur për objektivat e katalanasve këtë sezon, si dhe nuk ngurroi t’i thurë elozhe talentit 17-vjeçar, Ansu Fati. Mes të tjerash, strategu holandez i ekipit blaugrana tha:
“Objektivi është që t’i fitojmë të gjitha ndeshjet. Nuk është aspak e lehtë. Getafe është një skuadër e fortë dhe e ka treguar në kohët e fundit që merr më të mirën nga ndeshjet. Në vitin e fundit eliminoi Ajax nga Kupat e Europës dhe nuk është e lehtë. Shpresoj që lojtarët tanë të rikthehen nga kombëtaret pa probleme. Nuk dua të flas për objektiva afatgjatë, duhet që të fitojmë vetëm ndeshjen e radhës.
Ansu Fati? Jemi duke folur për një futbollist që është vetëm 17 vjeç. Ai ka luajtur në 3 ndeshjet me një nivel shumë të lartë. Ka talent, por duhet të mësojë akoma më shumë gjëra. Jemi këtu për ta ndihmuar”, u shpreh Koeman./abcnews.al
