Nuk siguroi dot mandatin, Spahia: E keqja fitoi një betejë por lufta vazhdon, gjithmonë aty për Shkodrën

Bardh Spahia, i shtati në listën e PD-së në Shkodër ku kjo forcë arriti të siguronte vetëm 5 mandate, ka falenderuar të gjithë ata që e mbështetën në garën e 25 prillit.

Në një postim në Facebook, Spahia i cili arriti që të siguronte 7,219 vota preferenciale që nuk mjaftuan për të dërguar në Kuvend, në një postim në Facebook shpreh mirënjohjen e tij për ekipin me të cilin punoi për Shkodrën, për të përcjellë atë që ai e cilëson si projekti për i ndryshimit për Shqipërinë.

Gjithashtu, Bardh Spahia thekson se e keqja e fitoi një betejë, por lufta vazhdon ndërsa zotohet që do të jetë gjithnjë aty për Shkodrën.

POSTIMI

MIRENJOHJE DHE RESPEKT!

Në pamundësi për t’ju falënderuar fizikisht secilin nga ju, dua t’ju shpreh mirënjohjen time me zemër për mbështetjen e pakursyer, që më dhatë në garën e 25 Prillit. Ajo mbështetje, që e kam ndjerë në vazhdimësi ndër vite kudo, që nga njerëz të njohur e panjohur në rrugët e qytetit tim, tek komshinjtë në lagjen time ku u rrita, tek të rinjtë e të rejat e deri tek miqtë e shumtë në rrjete sociale, është përgjegjësi dhe motivimi im për të qenë zëri juaj i pakompromis, në emër të Partisë Demokratike, në Kuvendin e Shqipërisë.

Mirënjohje për ekipin energjik e të motivuar, që punoi me mua ditë pas dite e pa orar, për të përcjellë projektin tonë të ndryshimit për Shqipërinë. Kam marrë mbështetje, por edhe kam mësuar shumë prej të rinjve të talentuar të qarkut tonë, njohje të hershme apo të reja, të kthyera tashmë në miqësi që do vijojë të forcohet.

Zhvilluam një betejë, të cilën e kishim fort për zemër, e të cilës i dhamë gjithë energjinë, përvojën, përkushtimin, por sidomos pasionin për të bërë më të mirën për Shkodrën tonë.

Falenderime nga zemra edhe për miqtë, kolegët mjekë, personalitete të fushave të ndryshme, e të njohurit e shumtë brenda e jashtë vendit, që edhe duke mos qenë banorë të Shkodrës, më inkurajonin me vëmendjen e tyre sistematike gjatë kësaj fushate.

Falenderime për familjen time, që më ka mbështetur pa kushte dhe me pasionin, përkushtimin dhe besimin e palëkundur në vlerat dhe aspiratat e Partisë Demokratike, të trashëguar nga një traditë e gjatë, e qëndrueshme dhe e pandryshueshme.

Falënderoj gjithashtu komisionerët, vëzhguesit, numëruesit dhe përfaqësuesit e PD, për impenjimin e tyre të jashtëzakonshëm gjatë këtyre ditëve e netëve të lodhshme. U jam pafundësisht mirënjohës!

E keqja fitoi një betejë, por lufta vazhdon! Unë do të jem gjithmonë aty për Shkodrën tonë, për Shqipërinë!

Ju falem të gjithëve,
Bardh Spahia   sb  /abcnews.al/