Tre shqiptarë janë vënë në pranga nga policia spanjolle pasi kishin realizuar një sërë grabitjesh në banesa në periferi të Madridit. Shqiptarët e moshave 25 dhe 30 vjeç, kishin hyrë në territorin spanjoll në tetor të këtij viti, periudhë gjatë së cilës kishin kryer edhe grabitjet.
Ata fillimisht udhëtonin me automjete të transporteve publike, duke piketuar shtëpi apo vila të ndryshme, të cilat ishin bosh në momentin e grabitjeve. Tre shqiptarët nuk e kishin aspak problem nëse filmoheshin nga kamerat e sigurisë apo nëse aktivizoheshin sistemet e alarmit. Për të hyrë në brendësi të shtëpive ata hapnin dyert ose dritaret e kateve përdhese.
Kryesisht ata vidhnin bizhuteri, sende me vlerë, kamera dhe paratë që mund të gjendeshin në banesa. Autoritet spanjolle bëjnë të ditur se, shqiptarët nuk qëndronin për një kohë të gjatë në territorin spanjoll, por pasi kryenin vjedhjet, largoheshin nga Spanja përmes rrugëve tokësore./abcnews.al
