Loading ...
Ambasadori i BE në vendin tonë Luigi Soreca ashtu si në rastin e shpalljes “non gratta” të ish-kryeministrit Sali Berisha, nuk ka pasur koment për komisionin parlamentar për shkarkimin e presidentit Ilir Meta.
Pyetjes për këtë zhvillim nga ana e mazhorancës, zoti Soreca është shprehur se këto janë cështje që i takojnë punëve të brendshme të Shqipërisë. Ndërkaq nuk ka ngurruar të vlerësojë zgjedhjet e 25 prillit si proces.
Madje ai shkoi edhe më tej duke thënë se janë pikërisht këto zgjedhje që përmbushën kushtet e çeljes së negociatave që priten së shpejti nga KE. Për zotin Soreca edhe në raportin paraprak të OSBE/ODIHR është vlerësuar procesi zgjedhor në ditën e zgjedhjeve.
Këto komente politike Soreca i ka bërë nga Përmeti nga ku ndodhej në kuadër të turit një javor që ka ndërmarrë në të gjithë vendin në kuadër të “Javës së Europës”.
Itinerarin e takimeve Soreca e ka nisur mesditën e sotme me një takim me kryebashkiaken e Përmetit Alma Hoxha nga ku është njohur me projektet e financuara nga BE në këtë qytet. Kryebashkiakja Hoxha me këtë rast veçse ka vlerësuar Sorecën, i ka dhënë edhe çelësin e qytetit.
Në takimet e sotme në Përmet, ambasadori i BE në vendin tonë ka inspektuar edhe panairin me punime të të rinjve vendas, produkte artizanale. Soreca shoqërohej nga ambasadorja e Greqisë Eleni Filipidhu, përfaqësues të Ambasadës Italiane në Tiranë, si dhe ambasadori shqiptar të BE Zef Mazi./ Abcnews.al
