Këtë të mërkurë është zhvilluar konferenca e pestë në Gjykatën Speciale, për çështjen gjyqësore ndaj Hashim Thaçit, Kadri Veselit, Rexhep Selimit dhe Jakup Krasniqit.
Në këtë mbledhje mbrojtja e Thaçit, Veselit, Selimit dhe Krasniqit ka kërkuar disponimin e materialeve, për shkak se kërkojnë kohë për përgatitje.
Në përgjigjen e saj, Zyra e Prokurorit të Specializuar tha se deri në qershor do t’i kenë të plota materialet për ish-krerët e Ushtrisë Çlirimtare.
“Materialet që janë kërkuar do t’i jepen mbrojtjes dhe ata do ta shikojnë vetë se nga cilës agjenci janë marrë informacionet”.
Ndërsa avokati i Thaçit, Pierre Richard Prosper, në seancën e sotme deklaroi se informacionet e ofruara nga Prokuroria nuk janë të plota.
“Informacioni që është vënë në dispozicion është pothuajse i palexueshëm. Dokumentacioni që na është dhënë nuk është i plotë, është i një kualiteti shumë të dobët. Besojmë që duhet nxjerrë më shumë informacion”, theksoi Prosper.
Sakaq nga Dhomat e Specializuara dhe Zyra e Prokurorit të Specializuar po hetohet për krimet e pretenduara se janë kryer nga pjesëtarë të Ushtrisë Çlirimtare të Kosovës, kundër pakicave etnike dhe rivalëve politikë në janar të vitit 1998.
/abcnews.al/
