Asdren Lekaj, asistent profesor në Universitetin e Prishtinës ka udhëtuar drejt Tiranës për të votuar ditën e sotme në njësinë numër 10 në kryeqytet.
Në një prononcim për gazetaren e ABC Linda Karadaku ai deklaroi se Shqipëria duhet të kryejë disa hapa drejt integrimit europian, ndërsa shtoi se është i lumtur që sot ka gjetur një klimë ndryshe në raport që është raportuar në media gjatë fushatës.
Rastin e familjes së tij, ku katër pjesëtarë votojnë për tre parti të ndryshe, deklaroi se duhet ta ndjekin edhe qytetarët shqiptarë për të qenë të pandikuar në përzgjedhjen e partisë apo kandidatit të preferuar.
“Unë e shfrytëzova të drejtën time të votës duke shpresuar që Shqipëria të kryejë disa hapa drejt integrimit europian. Unë mendoj që vota ime është shumë e rëndësishme për arsye se dua ta shoh Shqipërinë ta përparojë.
Jam i lumtur që e shoh Shqipërinë në një klimë të qetë ndryshe nga ajo që paraqitej gjatë fushatës. Shpresoj që pas përfundimit të orarit të votimit kështu të vazhdohet edhe me procesin e numërimit.
Klima politike duhet të jetë më e qetë dhe gjithçka të lihet në vullnetin e qytetarëve që ata të vendosin se kujt ia japin drejtimin e vendit. Rasti I familjes sime ishte që katër anëtarë kemi votuar për tre parti të ndryshme dhe kështu duhet të votojnë të gjithë shqiptarët për atë që duan”, deklaroi Lekaj./mv.abcnews.al
