Kukësi dhe Partizani përballen ndaj njëra-tjetrës mesditën e sotme si një prej ndeshjeve më të forta të kësaj jave. Para kësaj beteje ka folur drejtori sportiv i Kukësit, Nderim Nexhipi. I kontaktuar nga Supersport, ish-kapiteni i Partizanit flet për ndeshjen e sotme dhe atë të kaluarën ndaj Tiranës.
NDESHJET DIREKTE – “Si drejtor ndaj Partizanit dhe Tiranës kam bilanc pozitiv. Është fakt tani që te Kukësi po filloj sezonin e 3-të si drejtor. Ka qenë një eksperiencë e re për mua dhe njeri nga dita në ditë mëson më shumë gjëra.
OBJEKTIVAT – “Jemi në një kampionat ku ne si Kukësi futemi për të arritur te titulli kampion dhe të fitojmë Kupën. Këto dy vite nuk kemi fituar, por kanë ndikuar shumë faktor e sidomos që nuk luajmë në fushën tonë. Si çdo drejtues apo lojtar në një klub mund të ketë ndryshime, por deri tani jemi mirë. Shpresojmë që këtë vit të fitojmë titullin kampion”.
GEGA NDAJ PARTIZANIT – “Me trajnerin Gega jemi çdo ditë bashkë dhe flasim. Tani kampionati ka filluar dhe jam dakord që në një skuadër që ka shumë largime është e vështirë për ata të rinjtë që kanë ardhur pasi duan kohë të përshtaten.
Shumë lojtarë kanë dashur të largohen e tani me çdo lojtar kemi bërë kontrata afatgjata. Për trajnerin Gega ndeshja nesër është e veçantë. Si unë, si trajneri Gega dhe çdo lojtar që do të jetë në fushë do të bëjë maksimumin për të marrë fitoren”.
HUMBJA NDAJ TIRANËS – “Ne atë ditë bëmë një ndeshje jo të mirë dhe shumica e lojtarëve e kishin ndeshjen e parë në Superligë. Nga analizat që bëmë thamë që ishte një ditë e keqe. Duke parë ndeshjen mendoj se nesërme duhet të reflektojmë. E kam parë Partizanin dhe ata kanë lojtarë më shumë në formacion se vjet dhe ne duhet të reagojmë e të reflektojmë pas humbjes ndaj Tiranës”.
TRIDENTI I KUQ – “Ata janë një treshe (Bardhi, Asani, Mala) mjaft e mirë, e cila nëse është në momentin më të mirë bëjnë diferencën. Trajneri i njeh lojtarët dhe e ka përgatitur për mirë ndeshjen dhe besoj se do t’i ndalim si Bardhin dhe Asanin të dielën”, u shpreh drejtori i Kukësit. /abcnews.al
