Gjigandi i transmetimit Netflix ka ulur çmimet në më shumë se 30 vende teksa përpiqet të tërheqë më shumë abonentë.
Çmimet janë ulur në Azi, Evropë, Amerikën Latine, Afrikën Sub-Sahariane dhe Lindjen e Mesme.
Kjo vjen pasi rritja e kostos së jetesës po bën që Netflix të humbasi abonime dhe po përballet me konkurrencë të shtuar nga shërbimet rivale.
Vendet në të cilat tarifat e abonimit janë ulur përfshijnë Malajzinë, Indonezinë, Tajlandën, Filipinet, Kroacinë, Venezuelën, Kenia dhe Iranin.
Shkurtimet zbatohen për plane të caktuara çmimesh, me tarifat e abonimit që bien përgjysmë në disa raste.
Kompania nuk përmendi Mbretërinë e Bashkuar apo SHBA si vendet ku kishte ulur çmimet e saj.
“Ne jemi gjithmonë duke eksploruar mënyra për të përmirësuar përvojën e anëtarëve tanë. Mund të konfirmojmë se po përditësojmë çmimet e planeve tona në vende të caktuara,” tha një zëdhënës i Netflix.
Netflix, i cili operon në më shumë se 190 vende, është përballur me konkurrencë të shtuar nga rivalët e transmetimit, duke përfshirë Amazon, HBO dhe Disney.
Vitin e kaluar, firma shkurtoi qindra vende pune dhe lançoi një opsion më pak të shtrenjtë transmetimi me reklama, ndërsa luftoi në tregun gjithnjë e më konkurrues të transmetimit.
Në janar, bashkë-shefi ekzekutiv i Netflix, Greg Peters, përshkroi se si ai planifikon të tërheqë më shumë abonentë. Kompania gjithashtu po ndalon njerëzit të ndajnë fjalëkalimet e tyre.
Netflix prezantoi kufizime në ndarjen e fjalëkalimeve në më shumë vende në fillim të këtij muaji. Këto kërkojnë që klientët të paguajnë një tarifë shtesë nëse duan që miqtë dhe familja që nuk jetojnë me ta të ndajnë abonimin e tyre.
Verën e kaluar, Netflix zbuloi se kishte humbur pothuajse një milion abonentë midis prillit dhe fundit të qershorit pasi më shumë njerëz vendosën të linin shërbimin.
Megjithatë, në janar kompania tha se numrat e abonentëve ishin rritur në fund të 2022.
