Arrestohet në Greqi 41-vjeçari shqiptar me 4 emra i shpallur në kërkim ndërkombëtar për vrasjen e babë e bir të ndodhur në Elbasan rreth 8 vite më parë.
Policia njofton se në pranga është vënë Jorgo Leku i cili gjatë qëndrimit në Greqi ka ndërrur emrin e tij edhe tre herë të tjera për t’iu shmangur arrestimit. Leku njihej gjithatu si Olsi Leka alias Giorgo Lekou alias Jorgo Lekou.
Ai akuzohet se në gusht të vitit 2012 në bashkëpunim me disa persona të tjerë ka vrarë me armë zjarri babë e bir, Nezir dhe Gentian Beqiri, i njohur ndryshe si Ardian Meta. Ky i fundit asokohe ndodhej në arrest shtëpie, ndërkohë që ishte paralizuar gjatë një përplasje me policinë pasi ishte në kërkim për një krim të rëndë në Elbasan.
“Vijon bashkëpunimi i suksesshëm me Interpol Tiranës dhe homologëve, për kapjen e personave me rrezikshmëri të lartë shoqërore që janë shpallur në kërkim ndërkombëtar. Falë këtij bashkëpunimi dhe shkëmbimit të informacionit është kapur në Greqi, një tjetër i kërkuar për vrasje të dyfishtë.
Si rezultat i bashkëpunimit të suksesshëm mes Interpol Tiranës dhe Interpol Athinës, bazuar në shkëmbimin e informacionit të grumbulluar nga strukturat e Policisë së Shtetit, mbi vendndodhjen e mundshme të një personi të kërkuar për vrasje të dyfishtë, u bë i mundur arrestimi në Greqi i shtetasit shqiptar Jorgo Leku alias Olsi Leka alias Giorgo Lekou alias Jorgo Lekou, 41 vjeç, lindur në Elbasan dhe banues në Gjirokastër.
Ky shtetas ishte shpallur në kërkim ndërkombëtar, pasi Gjykata e Shkallës së Parë Elbasan, më datë 12.06.2020 i ka caktuar masën e sigurisë “Arrest në burg”, për kryerjen e veprave penale “Vrasja në rrethana të tjera cilësuese kundër dy ose më shumë personave” e kryer në bashkëpunim dhe “Armëmbajtja pa leje”.
Përmbledhje e ngjarjes së ndodhur:
Më datë 15.08.2012, në lagjen “Çlirimi”, Elbasan, në bashkëpunim me persona të tjerë, ka vrarë me armë zjarri shtetasin Aridan Meta alias Gentian Beqiri, i cili ishte me masë sigurie “Arrest në shtëpi” dhe të atin e tij Nezir Beqiri. Interpol Tirana, në bashkëpunim me Interpol Athinën, vijon procedurat e mëtejshme për ekstradimin e këtij shtetasi drejt vendit tonë”, njofton policia./mv. abcnews.al
