Për shkak të të nxehtit ekstrem në Indi, ku temperatura i kalon 50 gradë, më shumë se 100 persona kanë vdekur në tre muajt e fundit dhe 40 mijë kanë përjetuar goditje të nxehtësisë, njoftoi Ministria e Shëndetësisë.
Javët e fundit, disa pjesë të kryeqytetit, Nju Delhi, janë matur 51 gradë Celsius. Nxehtësia ka shkaktuar një konsum rekord të energjisë elektrike me ndërprerje të shumta të energjisë elektrike, po ashtu ka edhe mungesë të madhe të ujit.
Shumë vende në veri të Indisë, ku temperaturat po thyejnë rekorde, kanë mbyllur shkollat për shkak të vapës.
India shpall valë të nxehti sa herë që temperatura është mbi 40 gradë Celsius në fushat dhe 30 gradë Celsius në rajonet kodrinore. Muajt kryesorë të verës të prillit, majit dhe qershorit janë gjithmonë të nxehtë në shumicën e pjesëve të Indisë përpara se shirat e musonit të sjellin temperatura më të ftohta. Por nxehtësia është rritur gjatë dekadës së fundit, shpesh e shoqëruar nga mungesa të rënda të ujit që prekin dhjetëra milionë nga 1.4 miliardë njerëz të Indisë, raporton Beta-AP.
Sipas Shërbimit Meteorologjik, vala e të nxehtit të këtij viti, e cila tashmë ka zgjatur më shumë se tre javë, është ndoshta ndër më të gjatat e vazhdueshme në vend.
Të mërkurën, ministri i Shëndetësisë J. P. Nada urdhëroi autoritetet të ngrenë njësi speciale në spitalet shtetërore për të ndihmuar pacientët që vuajnë nga goditjet nga nxehtësia.
Numri më i madh i vdekjeve u regjistrua në shtetin federal indian të Uttar Pradesh, i ndjekur nga shtetet e tjera veriore të Rajasthan, Bihar dhe Odisha, të cilat janë më të prekurat nga i nxehti./abcnews.al
