Loading ...
Dashuria për të nuk ka ndryshuar aspak.
Ernest Muçi mbetet idhulli I tifozëve të Trabzonsporit, edhe kur nuk shënon, madje ndoshta tani janë bindur edhe më shumë për vlerën e tij.
Futbollisti I kombëtares shqiptare u la fillimisht në stol në sfidën e fazës së grupeve në Kupën e Turqisë, që u luajt në shtëpi kundër Analiasporit.
Në përfundim gjithçka u vendos nga goli I shënuar nga miqtë që në 17’, ndërsa Muçi e shfaqi sërish klasin e tij ndonëse në fushë ishte vetëm 30 minuta.
Ai provoi të shënonte vetë menjëherë pasi u aktivizua, në minutën e 63-të.
E pati mundësinë për të tundur rrjetën, rreth 7 minuta para përfundimit, por portieri mik Viktor bëri mrekullinë. Mëkat, do të kishte qenë goli I shtatë në 5 ndeshje, dhe realizim në pesë sfida radhazi.
Më pas krijoi një rast thuajse nga asgjëja duke shërbyer për shokun e ekipit.
Muçi mori përsipër gjithçka, pasime, gjuajtje, goditje nga këndi, por në futboll vlen edhe fati, po ashtu edhe kundërshtari.
Nuk mund të shënosh gjithmonë. Gjithsesi, futbollisti kuqezi e tregoi veten, ndërsa në Turqi vazhdon diskutimi për të ardhmen e tij.
Presidenti I Beshiktashit, Serdal Adali, ka deklaruar se gjithçka është e përcaktuar në kontratën mes dy klubeve, dhe do të realizohet sipas klauzolave.
Pra, ose Trabzonspori do të paguajë 8.5 milionë euro gjithsej për kartonin e tij, ose Muçi do të kthehet në Stamboll, dhe do të pritet të shihet nëse do të luajë sërish për Beshiktashin, apo do të shkojë në ndonjë skuadër tjetër.
