Në Spanjë është vënë në pranga Enver Bajri, i cili dyshohet si koka e grupit kriminal të “Bajrajve”. Në momentin e ndalimit, policia spanjolle i gjeti një pistoletë dhe 9 mijë euro. Një muaj më parë, Policia e Shtetit organizoi një operacion ku arrestoi disa pjestarë të grupit “Bajri” të cilët akuzohen për vepra të ndryshme penale.
Koka e grupit kriminal “Bajri” është arrestuar në Spanjë. Lajmi është bërë i ditur nga Policia e Shtetit. Në njoftimin e saj thuhet se Enver Bajri u vu në pranga në një operacion të koordinuar mes policisë spanjolle, policisë italiane dhe asaj shqiptare.
Ai u ndalua rreth orës 11:30 minuta të ditës së shtunë në San Huan, Alicante. Policia e Shtetit ishte në gjurmim të tij, duke përdorur metoda speciale të hetimit dhe në bashkëpunim me agjencitë e huaja ligjzbatuese.
Bajrit në momentin e ndalimit iu gjet një pistoletë, që e mbante pa leje dhe rreth 9 mijë euro. Ai është i dënuar edhe në Itali me 6.6 vite burg për veprat penale “Organizim i emigracionit të paligjshëm”, “Shfrytëzim prostitucioni” dhe “Falsifikim.
Bajri dyshohet se është drejtuesi i grupit kriminal “Bajri”, që ishte aktiv kryesisht në zonën e Shkodrës dhe u godit disa javë më parë. Policia e Shtetit organizoi një operacion në lagjet Kiras e Dobraç të Shkodrës si dhe në Tiranë , duke vënë në pranga disa pjestarë të grupit kriminal, ndërsa shpalli në kërkim disa të tjerë.
/abcnews.al
