Loading ...
Tifozët i kanë shprehur dëshirat e tyre, me sytë mbyllur dhe pa zë. Një popull i tërë në San Antonio të Teksasit, dhe rrethinat, shpreson dhe ëndërron që Spërsat të kthehen në kohët e tyre të arta, kur sfidonin Lejkërsat, Bostonin e të gjithë NBA-në duke fituar titujt.
Rikthimi i një “dinastie” është më afër që të ndodhë, tani që skuadra e udhëhequr nga Viktor Uembanijama kaloi raundin e parë të plej ofit, për herë të parë që nga 2017.
Portlend Trejl Blejzërs u eliminua në pesë ndeshje, me rezultatin e fitoreve 4-1. U desh të kalonin plot 9 vjet për kaq pak. Gjithsesi, besimi tek Uembi është edhe më I madh, sepse ai e mori për dore ekipin gjatë sezonit të rregullt, duke zënë vendin e dytë në Perëndim, duke qenë shumë pranë Oklahomës kampione, dhe që ishte më e mira e edicionit.
Ndaj Portlendit, gjiganti 22-vjeçari bëri thuajse gjithçka me 17 pikë, 14 topa në tabela, 3 asistë dhe 6 bllokime gjuajtjesh.
Në fitoren e thellë, 114-95, ai mori vlerësimin +20. E vërteta është që San Antonio ishte një skuadër, dhe 9 lojtarë dhanë kontribut të rëndësishëm me pikë, sidomos Foks me 21 dhe Shampanjë me 19.
Kundërshtarit nuk i mjaftoi Deni Avdija me 22 pikë. Spërsat janë shpallur 5 herë kampionë të NBA-së me yje të tillë si Dejvid Robinson, Tim Dankën, Manu Xhinobili, Toni Parker dhe Kauai Leonard. I fundit u fitua në 2015, por pas 11 vitesh duket se epoka e artë po kthehet./abcnews.al
