Situata e trazuar që ndodhi gjatë merkatës së janarit, krisi marrëdhënien mes Ousman Dembele dhe Barcelonës. Mos arritja e marrëveshjes mes palëve për rinovimin e kontratës dhe qëndrimi në ekip i sulmuesit francez bënë që për tifozët të jetë diçka e papranuar.
Trajneri Xavi Hernandez në një intervistë do të kërkonte nga tifozët të mos e vërshëllenin sulmuesin, por duhet ta ndihmonin atë të japë më të mirën e tij.
Një mundësi e mirë për të treguar se dëshiron të ndihmojë ekipin në ndeshjet e radhës erdhi. Derbi kundër Espanyol mund të jetë mundësia e artë e Dembelesë për të treguar sa vlen.
Sipas “Mundo Deportivo”, Hernandez ka në mendje që t’i japë francezit disa minuta në ndeshjen që Barça do të luajë në “Cornella” kundër Espanyol , këtë të diel nga ora 21:00.
Trajneri nuk e rreshtoi në ndeshjen e parë kundër Atleticos në “Camp Nou” dhe as nuk i dha minuta si zëvendësues. Klubi ia la mundësinë trajnerit për ta bërë atë të luajë sërish dhe kundër Espanyol, në “Cornella” , larg “Camp Nou”, mund të jetë momenti i zgjedhur për ta parë sërish në Barça, duke shmangur kështu reagimin e fitozëve në tribuna.
Burimet e klubit kanë shpjeguar megjithatë se Xavi nuk e ka më atë si një nga prioritetet e tij. Ardhja e Adama , Aubameyang dhe Ferran Torres do të thotë më pak hapësira për Dembele, ndërsa largimi i tij në verë është i pashmangshëm. /f.a/abcnews.al
