Besimtarët myslimanë në mbarë botën nisin në 1 mars, muajin e shenjtë të Ramazanit, periudhën më të rëndësishme të vitit për ta, të cilën e kalojnë në përkushtim, lutje dhe bamirësi. Gjatë këtij muajit të bekuar, besimtarët myslimanë mbajnë agjërim, një nga 5 kushtet e islamit. Gjatë ramazanit, besimtarët nuk do të konsumojnë ushqime, pije, si dhe shmangin çdo sjellje negative nga lindja e diellit deri në perëndim.
Besimtarët myslimanë që mbushën xhaminë e Namazgjasë në Tiranë këtë të premte po përgatiten për të nisur muajin e agjërimit.
Çdo besimtar e pret me gëzim Ramazanin, duke shpresuar në mëshirën dhe faljen e Zotit. Ata kërkojnë që t’ju pranohen lutjet, që e mira të triumfojë mbi të keqen. Për besimtarët kuy muaj konsiderohet si periudha ku trupi dhe shpirti pastrohet.
Në prang të nisjes së Ramazanit, kreu i komunitetit mysliman të Shqipërisë, Bujar Spahiu uroi të gjithë besimtarët.
“Me zemrën plot mirënjohje ndaj Krijuesit të gjithësisë, i cili na mundësoi ta arrijmë sërish këtë muaj të shenjtë, ju përcjell urimet më të përzemërta për një agjërim të lehtë dhe të pranuar, si në emrin tim personal, po ashtu edhe në emër të institucionit që unë drejtoj”.
Spahiu thekson se ky muaj është një mundësi për të rritur përkushtimin shpirtëror dhe për të forcuar ndjenjën e solidaritetit.
“Është një mundësi e artë për të shprehur falënderim ndaj Tij, për të kultivuar durimin, për të rivitalizuar lidhjen tonë me Kuranin Famëlartë dhe për të rrezatuar dashuri ndaj të tjerëve. Ramazani është gjithashtu muaji i solidaritetit dhe i vëllazërisë. Ai na kujton përgjegjësinë tonë ndaj atyre që kanë nevojë për ndihmën tonë dhe na fton të tregojmë bujari, dhembshuri dhe kujdes për më të dobëtit”.
Ramazani është muaji i nëntë i kalendarit hënor Islam. Muaji i agjerimit mbyllet me festën e Fiter Bajramit, në ditën e 30./abcnews.al
