Shënohet viktima e parë nga Covid 19 mes bluzave të bardha në Shqipëri.
Ai është mjeku hematolog Arjan Pushi. Ministria e Shëndetësisë njoftoi ndarjen nga jeta të hematologut në mesditë.
Mjeku hematolog po trajtohej prej ditësh në spitalin infektiv ndërkohë që nje ditë më parë gjendja shëndetësore e tij u përkeqësua dhe kolegët e intubuan.
Ndërkohë autoritete shëndetësore nuk kanë bërë të ditur burimin e infeksionit të mjekut.
Arjan Pushi ka patur një karrierë të spikatur në fushën e hematologjisë dhe ka përgatitur shumë breza studentësh të Mjekësisë.
Njoftimi i Ministrisë se Shëndetësisë:
“Ministria e Shëndetësisë njofton me hidhërim të thellë ndarjen nga jeta të profesorit të Fakultetit të Mjekësisë Arjan Pushi, i cili, referuar shërbimit infektiv, ndërroi jetë pak momente më parë në spitalin Infektiv, i prekur nga COVID19, pavarësisht përpjekjes maksimale të stafit mjekësor.
Prof. Arjan Pushi ka patur një karrierë të spikatur në fushën e hematologjisë dhe ka përgatitur shumë breza studentësh të Mjekësisë.
Ministria e Shëndetësisë i shpreh ngushëllime famljarëve dhe miqve të profesor Arjan Pushit”, thuhet ne njoftimin e Ministrisë.
Ndërkohë edhe Ministrja e Shëndetësisë ka reaguar në lidhje me ndarjen nga jeta të mjekut Arjan Pushi.
Me anë të një statusi në facebook, Manastirliu shkruan se ndarja nga jeta e Profesor Pushit është humbje e madhe për stafin, miqtë dhe familjen e tij.
“Megjithë përpjekjet e kolegëve të cilët bënë të pamundurën për ta mbajtur në jetë Prof. Arjanin, ai nuk ja doli dot në betejën me virusin e rrezikshëm”, shkruan Manastirliu.
Postimi:
Ndarja nga jeta e Profesor Arjan Pushit është një dhimbje e madhe për familjen, për miqtë e tij, për kolegët, pedagogët e Universitetit të Mjekësisë ku ka shërbyer për shumë vite.
Kontributi i çmuar i Profesor Arjan Pushit për mjekësinë shqiptare, do të mbetet i pashlyeshëm ndër breza.
Megjithë përpjekjet e kolegëve, të cilët bënë të pamundurën për ta mbajtur në jetë në spitalin infektiv, prof. Arjani nuk ia doli dot, në betejën me virusin e rrezikshëm.
U prehsh në paqe Profesor Pushi!
Ngushëllime të sinqerta familjes dhe miqve. Ju jemi pranë në këto momente të vështira!”
. /abcnews.al
