Bylisi-Partizani pati disa raste të diskutueshme dhe Bujar Pregja, specialist gjykimi në emisionin “Pressing” në ABC, dha mendimin e tij. “Rasti i parë është një pretendim i Partizanit për penallti. Të dy lojtarët fusin këmbën dhe them se nuk ka faull dhe rrjedhimisht as penallti.
Të shohim edhe penalltinë që mori Bylisi, lojtari i Partizanit e mbështjell lojtarin e Bylisit. Faji është i mbrojtësit, nuk duhet ta bënte atë veprim”, tha Pregja, ndërkohë që në studio i pranishëm ishte edhe Rron Broja, i cili e kishte shkaktuar 11-metërshin.
“Më duket penallti e lehtë, por kur e sheh në video mendoj se nuk ka pasur faj gjyqtari. Penalltia ishte”, tha Broja me sinqeritet, ndërkohë që më pas Pregja foli për penalltinë që morën “demat e kuq” në favor.
“Kemi rastin e penalltitë së Partizanit. Çinari u rrëzua dhe nuk kemi të bëjmë me faull. Nuk kemi të bëjmë me penallti. Madje është faull në sulm. Arbitri ka qenë i përqendruar te këmbët dhe nuk i ka parë fare duart, them unë. Nuk i tolerohen këto gabime Jorgjit, është arbitër i FIFA-s dhe me eksperiencë”.
“Kemi kartonin e kuq të lojtarit të Bylisit. Reagimi i tij është i gabuar, tenton të godasë dhe godet është njëlloj. Lojtari i Partizanit nuk bëri lëvizje”, përfundoi moviolën e takimit Bylisi-Partizani, Bujar Pregja. /abcnews.al
