Loading ...
Reshjet e dendura dhe erërat e forta të hënën ndërprenë shërbimet e fluturimeve dhe lanë mijëra prona pa energji elektrike në të gjithë Ishullin Verior të Zelandës së Re.
Më shumë se 30 mijë prona kanë mbetur pa energji elektrike pasi erërat e fuqishme rrëzuan pemë dhe linja elektrike në pjesën më të madhe të Ishullit Verior të poshtëm, sipas Radio New Zealand (RNZ).
Ofruesi i energjisë elektrike “Powerco” raportoi rreth 23 mijë ndërprerje në të gjithë rrjetin e tij, përfshirë afërsisht 10 mijë vetëm në rajonin e Wellingtonit. Pamjet që qarkullojnë në internet tregojnë lagje gjysmë-rurale të përmbytura, shtëpi të mbushura me ujë dhe pjesë të rrugëve të dëmtuara pas tërheqjes së ujërave të përmbytjes.
Kryesisht rajoni Manawatu-Whanganui është goditur rëndë dhe tani ndodhet nën gjendje të jashtëzakonshme. Evakuimet janë duke u zhvilluar në rrugën Lincoln në Masterton për shkak të rrezikut që paraqesin pemët që bien.
Ndihmës komandanti i Wairarapa-s, Ian Wright e përshkroi natën si të ngarkuar me thirrje emergjente të lidhura me motin që janë duke vazhduar, duke paralajmëruar se pemët që bien mbeten rreziku më i madh. Ai tha se pemët me rrënjë të cekëta në rrugën Lincoln janë “shumë të paqëndrueshme, kështu që të dy rrugët janë mbyllur dhe njerëzit janë evakuuar”.
Air NZ ka anuluar fluturimet për në dhe nga disa qendra kryesore, përfshirë kryeqytetin Wellington, për shkak të erërave të forta. “Siguria është parësore dhe ne po vazhdojmë të monitorojmë nga afër kushtet, me erërat që pritet të ulen më vonë këtë mëngjes kur presim të rifillojmë shërbimet”, tha drejtori operativ Alex Marren.
Pesë distrikte përfshirë Manawatu, Rangitikei, Tararua, Waipa dhe Otorohanga janë nën gjendje të jashtëzakonshme.
Shpejtësia e erës kanë arritur deri në 240 kilometra në orë në bregdetin lindor të Ishullit të Veriut të poshtëm, përfshirë Cape Turnagain ndërsa pjesët e larta të Wellington kanë regjistruar erëra deri në 190 km në orë dhe rreth 130 km në orë në qytet.
Erërat e forta dhe shirat e rrëmbyeshëm pritet të vazhdojnë mbi Ishullin e Veriut të poshtëm përpara se të zhvendosen gradualisht në jug më vonë të hënën.
