Kryeministri i Ukrainës ka thënë për BBC-në do të ketë një “Luftë të Tretë Botërore” nëse Ukraina humb konfliktin e saj me Rusinë, pasi i kërkoi Kongresit të SHBA-së të miratojë një projekt-ligj të mbetur pezull prej kohësh.
Denys Shmyhal shprehu “optimizëm” se ligjvënësit amerikanë do të miratonin paketën prej 61 miliardë dollarësh të destinuar për Kievin. Dhoma e Përfaqësuesve do të votojë për këtë paketë këtë të shtunë.
Propozimi përfshin financim për Izraelin si dhe Indo-Paqësorin.
Kjo nuk është hera e parë që Ukraina lëshon një paralajmërim kaq alarmues për pasojat e humbjes së saj të mundshme. Vitin e kaluar, presidenti Volodymyr Zelensky tha se nëse Rusia fitonte konfliktin, ajo mund të pushtonte Poloninë, duke shkaktuar Luftën e Tretë Botërore.
Muajin e kaluar presidenti Vladimir Putin hodhi poshtë sugjerimet se Rusia një ditë mund të sulmonte Europën Lindore si “të pakuptimta”. Rusia nuk ka sulmuar kurrë një vend brenda NATO-s, i cili përfshin Poloninë.
Presidenti Zelensky ka thënë se 31,000 ushtarë ukrainas janë vrarë që nga viti 2022. Zyrtarët amerikanë, megjithatë, besojnë se të paktën 70,000 kanë vdekur dhe shumë të tjerë janë plagosur.
Një hetim i BBC llogarit se të paktën 50,000 trupa ruse janë vrarë. Dhjetëra mijëra besohet se janë plagosur.
/abcnews.al
