Njohja e një shteti palestinez nga tre vende europiane përbën një “moment historik”, njoftoi sot Organizata për Çlirimin e Palestinës (PLO), duke e cilësuar atë si rrugën drejt stabilitetit, sigurisë dhe paqes në rajon.
“Ky është një moment historik i triumfit për botën e lirë pas shumë dekadash të luftës kombëtare palestineze, vuajtjes, dhimbjes, racizmit, vrasjes, shtypjes, keqtrajtimit dhe shkatërrimit të cilit i është nënshtruar populli i Palestinës,” theksoi Husein al Sheikh, Sekretar i Përgjithshëm i Komitetit Ekzekutiv të OAP-së, në një postim në rrjetet sociale X.
Në të njëjtën kohë, lëvizja islamike palestineze Hamas shprehu kënaqësinë e saj për njohjen e një shteti palestinez nga Irlanda, Spanja dhe Norvegjia, të cilat e cilësuan atë si një “hap të rëndësishëm”.
“Ne e konsiderojmë këtë një hap të rëndësishëm drejt vërtetimit të së drejtës sonë për tokën dhe krijimit të një shteti palestinez me Jerusalemin si kryeqytet”, tha Hamasi në një deklaratë, duke u bërë thirrje “vendeve në mbarë botën të njohin të drejtat legjitime kombëtare të palestinezëve”.
“Rezistenca e guximshme e palestinezëve bëri që tre vende (Norvegjia, Irlanda dhe Spanja) të njohin shtetin e Palestinës, tha në të njëjtën kohë AFP Bassem Naim, një anëtar i zyrës politike të lëvizjes islamike palestineze.
Këto njohje të njëpasnjëshme janë rezultat i drejtpërdrejtë i kësaj rezistence të guximshme dhe këmbënguljes historike të popullit palestinez, ne besojmë se kjo është një pikë kthese në pozicionin ndërkombëtar për çështjen palestineze, theksoi Naimi.
/abcnews.al
