Nga Ema Shazivari
Prej më shumë se një javë, në spitalin Infektiv ka pasur një rritje të lehtë të pacientëve të shtruar. E ndërsa para dy javësh ishin të shtruar vetëm 2 pacientë, aktualisht numri i tyre ka shkuar në 8. Mjeku infeksionist Edmond Puca, thotë se ndikim ka pasur edhe hapja e kufijve apo lirimi i masave.
“Është normale që të jetë një përhapje e tillë për arsye se numri i lëvizshmërisë është më i rritur. Presim që të vinë emigrantët, që mund të kenë njëfarë tendence për shtim të infeksioneve. Nga ana tjetër duke qenë se është sezon plazhi lëvizshmëria, apo mungesa e maskave janë disa nga faktorët,” thotë ai.
Mjeku thotë se për shumë ditë nuk paraqitet asnjë rast në urgjencë.
“Numri i rasteve është i limituar. Përgjithësisht kemi një pacient në ditë. Ka disa ditë që nuk ka pasur pacientë. është një situatë që duket e qëndrueshme, por prapë kërkon të ketë vëmendje,” thekson mjeku.
Personat e vaksinuar të cilët infektohen dhe kanë nevojë për hospitalizim, trajtohen në spitalin “Shefqet Ndroqi”, pasi në shumë raste rezultojnë me tampon negativ. /abcnews.al
