Studentët e mjekësisë së përgjithshme në universitetin publik nuk përjashtojnë mundësinë e rikthimit të protestave dhe ankimimin në gjykata ndërkombëtare të projektligjit që I detyron të punojnë në Shqipëri pas diplomimit.
Ata kundërshtojnë edhe draftin e ndryshuar nga qeveria pas vendimit të Kushtetueses dhe thonë se nuk dolën në rrugë për të reduktuar vitet e qëndrimit në atdhe, por filozofinë e ligjit në tërësi.
“Ne tashmë jemi në bisedime e sipër me avokatët tanë, dhe jemi drejt përfundimit të një drafti ligjor për ta çuar çështjen dhe në gjykata ndërkombëtare. Çdo përpjekje për të na injoruar në vazhdim do të ketë përgjigje si një vit me parë.”
“Problemi ynë dhe i gjithë studentëve është në princip me këtë ligj, nuk mendojmë se është mënyra e duhur si mund ti jepet zgjdihje këtij problemi që është hapur. “
Me draftin e hedhur për konsultim afatet e punësimit në vend për mjekët e rinj ulen nga pesë në tre vjetë për studentët e vitit të parë, për studentët e vitit të dytë deri në të katërt nga tre në dy vjet dhe për studentët e vitit të pestë dhe të gjashtë në 1 vit, por mjekët e rinj thonë se mbajtja peng e diplomës nuk është zgjidhje për ti mbajtur në Shqipëri.
“Kur studentët e mjekësisë ishin kaq të rëndësishëm për Shqipërinë, pse ata nuk u trajtuan si të tillë? Në momentin që Gjykata Kushtetues rrëzoi ligjin pse ministritë përkatëse nuk ftuan studentë për takime dhe diskutime për të parë mundësinë si mund ti mbajmë në Shqipëri. Mbajtja peng e diplomës dhe puna e detyruar dy nuk janë mënyra optimale as ideale për të mbatjur mjekët në Shqipëri. Ka mënyra më tepër optimale si investimi në sektorin arsimor dhe shëndetësor të cilat nuk lënë vend për punë të detyruar por vetëm për punë të dëshiruar.”
“Studentët e mjekësisë nga kjo situatë janë bërë të flenë më një sy hapur dhe jemi gjithmonë gati të mbrojmë atë që është e drejtë dhe atë që është e mirë dhe për Shqipërinë dhe për ne “
Projektligji për studentët që ndjekin degën mjekësi e përgjithshme në institucionet e arsimit të lartë publik u ndryshua nga qeveria pas vendimit të Gjykatës Kushtetuese për plotësimin e tij dhe është hedhur për konsultim publik./abcnews.al
