Kryeministri grek , Kyriakos Mitsotakis këtë të martë i ka dërguar një propozim Këshillit Europian për një certifikatë standarde të vaksinimit ndaj COVID-19.
Mediat greke bëjnë me dije se Mitsotakis, ka theksuar se përderisa vaksinimi nuk është i detyrueshëm, atëherë personat që kanë marrë vaksinën duhet të lëvizin lirshëm, të paktën mes shteteve anëtare të BE.
”Sigurimi i rifillimit sa më të shpejtë të lëvizjes së lirë të personave midis shteteve anëtare, por edhe me vendet e treta është një përparësi themelore për të gjithë ne. Për këtë arsye në Greqi, ne lëvizëm shpejt dhe zbatuam procedurat për të lehtësuar lëvizjen e lirë të personave të vaksinuar kundër Covid-19. Një hap kryesor në këtë drejtim është krijimi i një certifikate standarde, e cila do të provojë se një person është vaksinuar me sukses ”, është shprehur Mitsotakis.
Ndërkohë pritet që Këshilli Europian në takimin e krerëve të shteteve të diskutojë edhe për këtë propozim që mund të shihet si çelësi i lëvizjes së lirë në BE edhe gjatë pandemisë./abcnews.al
