Personi që shihni në foto është 20-vjeçari Pavlin Preka I cili u ekzekutua me armë zjarri në oborrin e banesës së tij në fshatin Guci e Re të Shkodrës, të enjten.
Rreth 20 persona janë shoqëruar nga policia vendore e Shkodrës për t’u marrë në pyetje lidhur me hetimet që po vijojnë.
Vrasja e të riut është e rrethuar nga misteri pasi policia deri më tani nuk ka asnjë autor të dyshuar dhe as pista hetimi përse u ekzekutua Pavlin Preka.
Të shoqëruarit nga policia janë kryesisht banorë të zonës, persona që mund të kenë pasur dijeni për viktimën apo individë të njohur si problematikë në fshat.
Megjithatë, deri tani nuk ka asnjë autor të dyshuar dhe hetimet vijojnë pa një identifikim të qartë të autorit ose autorëve. Pavlin Preka jetonte mes Dukagjinit dhe Gucisë, së bashku me babain dhe vëllain e tij, duke u marrë me bagëti. Ai u ekzekutua me 6 plumba nga një distancë e afërt.
Banorët e zonës kanë deklaruar për grupin hetimor se nuk kanë dëgjuar krisma, duke ngritur dyshime se vrasja mund të jetë kryer me pistoletë me silenciator. Viktima u gjet pa jetë në oborr nga xhaxhai i tij. Nga hetimet paraprake dyshohet se autori ose autorët e kanë thirrur 20-vjeçarin për ta nxjerrë nga banesa dhe më pas e kanë ekzekutuar ne oborrin e shtëpisë. Pas krimit, ata janë larguar duke shfrytëzuar terrenin malor të zonës.
Hetimet janë të vështira, pasi në zonë nuk ka kamera sigurie që mund të ndihmojnë në identifikimin e autorëve./abcnews.al
