Presidenti Ilir Meta ka deklaruar mbrëmjen e sotme se mbyllja e televizionit të sipërmarrësit italian Francesco Becchetti ka qenë një hakmarrje e pastër për qëndrimet e tij kundër qeverisë.
Ai tha në Syri Tv se në këtë rast mbështet thirrjen e kreut të Partisë Demokratike Lulzim Basha se faturat e krijuara nga humbja e proceseve gjyqësore në Gjykatat Ndërkombëtare të paguhen nga personat përgjegjës.
“Unë nuk besoj të bojkoti i proceseve në demokraci, nuk jam naiv që të besoj që demokracia shkon në mënyrë perfekte ne vendin tone. Çdo ditë duhet të luftosh për demokracinë, për të drejtat dhe liritë e çdo qytetari. Rasti Becchetti ka qenë një hakmarrje e pastër sepse ka qenë një stacion kritik ndaj Qeverise.
Unë nuk mund të them që ka një marrëveshje, por mund të them që ka nisur si një hakmarrje, si një përpjekje për të shtypur, për të mbajtur në trysni, për të mbajtur në presion një media të caktuar. Kam krijuar bindjen tim se, çështjet e humbura në Gjykatën e Arbitrazhit Ndërkombëtar nga ana e shtetit shqiptar, është kthyer në çështje të biznesit të pamëshirshëm, duke përfituar të dyja krahët.
Kemi vërejtur se prishjet e kontratave kanë lënë një gjë shumë të frikshme, kjo e tregon nga mungesa e provave të mbrojtjes që ka bërë pala shqiptare atje. Mbështes propozimin e kryetarit të Opozitës, që faturat e krijuara nga humbja e proceseve gjyqësorë në Gjykatat Ndërkombëtare të paguhen nga personat përgjegjës”, deklaroi Meta./mv.abcnews.al
