Mësues muzike për 30 vite/ Tusha: Kam zbuluar shumë të rinj të talentuar, vegla më e vjetër muzikore që kam është 300 vjeçare

Gjithë jetën ia ka kushtuar muzikës dhe mësimdhënies.

Prej gati 30 vitesh Nikoll Tusha ka shërbyer në shkolla të ndryshme të Rrëshenit si mësues muzike.

Ka edukuar breza e ka zbuluar shumë të rinj të talentuar.

Një ndër pasionet më të mëdha të tij kanë qenë instrumentet muzikore.

Ka luajtur në kitarë, fizarmonikë e organo.

Pasioni për këto instrumente e nxiti të krijojë në Rrëshen një kabinet me vegla të ndryshme muzikore, më e vjetra gati 300 vjeçare.

Mësues Nikolla njihet nga të gjithë në qytet dhe gëzon mirënjohje nga çdo banor.

Ata e vlerësojnë jo vetëm për përkushtimin e treguar në edukimin e fëmijëve por edhe për koleksionin e çmuar të instrumenteve muzikore.

Pikërisht ky vlerësim por edhe lidhja e fortë me vendin e tij e ka bërë mësues Nikollën të refuzojë ftesat e të afërmve për t`u larguar drejt shteteve të Bashkimit Europian.

Ai thotë se do të vijojë të qëndrojë në Rrëshen për të kontribuar sa mundet për ruajtjen e vlerave që qyteti ka trashëguar ndër shekuj./abcnews.al