Lodi Luka është një kompozitor, pianist dhe dirigjent i njohur. Ai jeton prej vitesh në Itali ku dhe ushtron aktivitetin e tij artistik. Në një intervistë për emisionin “Abc-ja e mëngjesit”, ai tregoi se u largua nga Shqipëria në fund të viteve ’90 ku dhe kreu studimet për piano në shtetin fqinj.
“Muzika ka qenë gjithmonë e pranishme në familjen time. Mora mësimet e para nga daja im nga Zef Çoba dhe vazhdova studimet në shkollën e mesme “Preng Jakova”. Mu dha mundësia për të studiuar në Itali në ’98. Ishte një ëndërr për mua. Studiova për piano dhe kompozim.
Më vonë më lindi dëshira të studioj për dirigjim. Ishte shumë e vështirë sepse shkova vetëm në një vend të ri, në një moshë të re. Në fillim isha në jug të Italisë dhe kam pasur përkrahjen e një prifti që më ka ndihmuar që të fokusohesha tek studimi.
Pa ndihmën e dikujt është e vështirë dhe në atë kohë nuk kishte bursa studimi por kur është vullneti, i kalon të gjitha.”, tha ai. Luka foli gjithashtu dhe për krijimin më të fundit të tij që mban titullin “Where eagles fly”, një simfoni që e krijoi gjatë pandemisë dhe që lidhet me Shqipërinë.
“Është një vepër që kam shkruar gjatë pandemisë kur ishim të mbyllur. U dedikova për dy vjet kësaj vepre, rreth 25 minuta me katër kohë të ndryshme ku unë doja të përfytyroj dhe ambientin shqiptar por dhe jetën e njerëzve. Shpresoj që një ditë kjo simfoni të ketë një ekzekutim në Shqipëri.
Është dëshira që të kesh një lidhje me vendin tënd dhe të japësh një kontribut në Shqipëria. Dua që muzika ime të njihet atje.”, tha ai. Ndërkohë, prej disa kohësh ai është bërë pjesë e konservatorit të njohur “Arrugo Boito” në Parma, ku ka qenë gjithashtu dhe Arturo Toskanini.
“Është një përgjegjësi e madhe. Këtë vit kalova në konservatorin më antik në Itali që ekziston që në shekullin 19, ku janë formuar personazhe dhe muzikantë që kanë bërë histori si Arturo Toskanini. Është një nder i madh të punoj në këtë institucion dhe një detyrim që të justifikoj këtë mundësi që më është dhënë.”, tha ai.
/abcnews.al
