Lionel Mesi vlerësohet lart nga gjithë bota e futbollit, pasi arriti 100 gola në Champions. Argjentinasi mbetet vendimtar për Barcelonën, ndërsa eleminoi një Çelsi aspak të keq.
Epoka e tij nisi në 2 nëntor të vitit 2005. Historia e Lionel Mesit filloi pikërisht në “Kamp Nou” me golin e parë në Champions, atë ndaj Panathinaikosit, ndërsa tani arriti në kuotën 100.
Superylli i Barcelonës, dominuesi i futbollit botëror, shprehimisht vendosi fatin e kualifikimit në duelin e madh ndaj Çelsit.
I mbiquajtur jo pa të drejtë si Perëndia e këtij sporti, ai përcaktoi se ekipi i tij duhej të shkonte në çerekfinale, dhe Blutë e Londrës, aspak zhgënjyes, duhej të ktheheshin në shtëpi.
Katalanasit triumfuan 3-0 përballë një kundërshtari që i vuri në vështirësi serioze, që goditi sërish dy herë shtyllat, dhe ky ishte vërtet një paradoks.
Kështu ndodh kur në ekip ke argjentinasin, i cili shënoi 3 nga 4 golat e Barçës ndaj Çelsit, dhe asistoi të katërtin.
Mesi: “Është një kënaqësi e madhe të arrish në 100 gola në këtë kompeticion kaq të bukur dhe të rëndësishëm. Jam I kënaqur edhe për veten, por edhe për ekipin, dhe për faktin se ia dolëm në një ndeshje shumë të vështirë, ndaj një kundërshtari tepër të fortë dhe që ka lojtarë të mëdhenj. Ne luftuam deri në fund, të bashkuar si skuadër, dhe kur rezultati arriti në 3-0, praktikisht e arritëm kualifikimin”.
Dikur Pep Guardiola thoshte se pa Mesin, do të kishte qenë ende trajner në kategorinë e dytë.
Trajneri i sotëm i Leos, Ernesto Valverde, është njeriu me fat i radhës.
Valverde: “Ndeshja nuk ishte aspak e lehtë. Rivali ishte një ekip i madh, me lojtarë të shkëlqyer. E dinim këtë që kur shorti na vuri përballë Çelsit, dhe ndodhi siç e prisnim, ndaj e vlerësoj shumë kualifikimin tonë. Është e vërtetë që Çelsi goditi katër herë shtyllat në dy ndeshje, por në Londër lojën e dominuam ne, dhe në të dyja ndeshjet, golin e kërkuam më shumë ne. Për fat, kemi në skuadër Mesin, dhe kushdo që e ka Mesin, e ka më të lehtë”.
Trajneri pa fat në mbrëmjen e 14 marsit në “Kamp Nou” e kishte emrin Antonio Konte.
Konte: “Goli i pësuar që në minutën e dytë na dëmtoi shumë, por arritëm të reagonim, krijuam raste, madje duhej të na ishte dhënë një penallti. Në dy ndeshje goditëm katër herë shtyllat ndaj Barcelonës, por në 180 minuta, diferencën e bëri një lojtar super, super i madh si Mesi. Shënoi 3 gola, dha asistin për Dembelenë, ishte shkatërrues”.
Njeriu që e pësoi direkt prej Mesit ishte portieri I Çelsit, Tibo Kurtua.
Kurtua: “Nuk mendoj se duhej të ishim eleminuar, por bëmë gabime në të dyja ndeshjet dhe u ndëshkuam. Në golin e parë, nuk e prisja që Mesi të gjuante në atë pozicion dhe i mbylla këmbët me vonesë. Ishte gabimi im”.
Mediat nuk mund të mungonin në lavdërimet pa kufi për 30-vjeçarin.
Gazeta “Marka”: Eurotunel! Mesi kthehet të bëjë diferencën me dy gola dhe një assist. Mund dy herë Kurtuan mes këmbëve!
“AS”: Goditje e La Ligës ndaj Premier Ligës! Real, Sevilja e Barça, Spanja është ekipi me më shumë ekipe në Champions!
Recital i ri i Mesit!
“El Mundo Deportivo”: Babai Ynë! Një tjetër shfaqje kolosale e Mesit që kualifikon Barçën në çerekfinale për herë të 11-të radhazi!
“Sport”: Ekstazë! Barça në çerekfinale të Championsit me një Mesi mbinjerëzor!
“Deili Mirror”: Mesi çmendet! Magjiku i Barçës hipnotizon Kurtuanë dy herë duke eleminuar Blutë trima nga Europa!
“Dhë San” bën lojë fjalësh: “Kërt-aut”, që do të thotë edhe jashtë Arenës, por edhe emri i portierit të Çelsit, pak I ndryshuar!
Tibo i hipnotizuar dy herë nga Leo!
L’Ekip: 100 historitë! Falë një dysheje, Mesi arrin barrierën e 100 golave në Champions
“La Gazeta delo Sport”: Perëndia Mesi bën diferencën mes Kontes dhe Barcelonës, 3-0!
Së fundi, nga Amerika e Jugut, “Meridiano” i Venezuelës: Legjenda shekullore! Mesi arrin 100 gola në Champions!
Mesi ka ende më pak gola sesa Kristiano Ronaldo në Ligën e Kampionëve, që ka arritur në 118, veçse kuotën 100 e mbërriti më shpejt sesa portugezi i Realit. /abcnews.al
