Elseid Hysaj mbetet në qendër të vëmendjes. Mbrojtësit të Napolit i përfundon kontrata më 30 qershor dhe klubi italian duhet të gjejë një zëvendësues për lojtarin e kombëtares shqiptare.
Hysaj luan në të dy krahët e mbrojtjes dhe sipas “TuttoNapoli” është e vështirë të gjendet një lojtar me karakteristikat e tij, ndaj te Napoli po mendojnë që të tentojnë rinovimin me shkodranin e marrë nga Empoli në vitin 2015.
Gjithsesi Hysaj tani e ka vetë në dorë të ardhmen, pasi del lojtar i lirë. Sigurisht ai është i lumtur dhe i lidhur me Napolin, por nga ana tjetër e “josh” një tjetër aventurë. Pse jo edhe jashtë Italisë, ku PSG vijon të jetë opsion.
“Le10sport” shkruan se francezët janë në kërkim të një mbrojtësi të djathtë dhe po shohin disa opsione. Serge Aurier i Tottenham është një prej pistave më të lakuara për momentin.
PSG nuk do ta blejë nga Roma Alessandro Florenzin dhe media franceze shkruan se Leonardo po mendon të marrë Hysajn në vend të tij. Fakti që nuk duhet paguar një tarifë transferimi e lehtëson këtë lëvizje, edhe pse në Itali Fiorentina është një nga klubet që interesohet për shkodranin. /abcnews.al
